Спогодбата се однесува на две тужби кои ги опфатија трите производи на компанијата, а се поврзани со наводно кршење на законот за заштита на потрошувачите во Тексас, пренесува Ројтерс.
„Во Тексас, големите технолошки компании не се над законот. Google со години тајно ги следел движењата на луѓето, нивните приватни пребарувања, па дури и нивниот глас и геометријата на лицето преку своите производи и услуги. Јас се спротивставив – и победив“, изјави Пакстон.
Деталите од спогодбата не се објавени, ниту е наведено како ќе бидат искористени средствата. Од Google соопштија дека спогодбата се однесува на обвинувања поврзани со „инкогнито“ режимот, историјата на локација и биометриските податоци.
Компанијата не призна никаква вина. „Со оваа спогодба затвораме низа стари обвинувања – од кои многу веќе се решени на други места – кои се однесуваат на политики за производи што одамна ги променивме“, изјави портпаролот на Google, Хозе Кастанеда.
Пакстон двапати го тужеше Google во текот на 2022 година. Тој, исто така, ја обвини компанијата дека ја следела локацијата на корисниците дури и кога тие сметале дека ја имаат исклучено таа функција, како и дека ги довела во заблуда во врска со приватноста во „инкогнито“ режимот.
Според Google, спогодбата не предвидува обврска за измена на производите. Компанијата Meta Platforms, сопственик на Facebook и Instagram, минатата година се согласи да плати 1,4 милијарди долари за да ги реши сличните обвинувања, поднесени исто така од Пакстон.
Извор – bizlife.rs
